ਓਟਾਵਾ: ਨਵੇਂ ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਨੇ ਬੁੱਧਵਾਰ ਨੂੰ ਆਪਣੀ ਹਾਊਸ ਲੀਡਰਸ਼ਿਪ ਟੀਮ ਦਾ ਐਲਾਨ ਕੀਤਾ। ਮੁੱਖ ਵਿਰੋਧੀ ਧਿਰ ਲਈ ਕੀਤੀਆਂ ਗਈਆਂ ਨਿਯੁਕਤੀਆਂ ਤਹਿਤ ਮੈਨੀਟੋਬਾ ਤੋਂ ਐਮਪੀ ਕੈਂਡਿਸ ਬਰਜਨ ਨੂੰ ਹਾਊਸ ਡਿਪਟੀ ਲੀਡਰ ਥਾਪਿਆ ਗਿਆ।
ਕਿਊਬਿਕ ਤੋਂ ਐਮਪੀ ਰਿਚਰਡ ਮਾਰਟਨ ਤੇ ਗੇਰਾਰਡ ਡੈਲਟੈਲ ਨੂੰ ਕ੍ਰਮਵਾਰ ਕਿਊਬਿਕ ਤੋਂ ਸਿਆਸੀ ਲੈਫਟੀਨੈਂਟ ਤੇ ਵਿਰੋਧੀ ਧਿਰ ਵੱਲੋਂ ਹਾਊਸ ਲੀਡਰ ਨਿਯੁਕਤ ਕੀਤਾ ਗਿਆ। ਇੱਥੇ ਦੱਸਣਾ ਬਣਦਾ ਹੈ ਕਿ ਸਟੀਫਨ ਹਾਰਪਰ ਦੀ ਕੰਜ਼ਰਵੇਟਿਵ ਸਰਕਾਰ ਵਿੱਚ ਬਰਜਨ ਮਨਿਸਟਰ ਆਫ ਸਟੇਟ ਫੌਰ ਸੋਸ਼ਲ ਡਿਵੈਲਪਮੈਂਟ ਸੀ। ਓਟੂਲ ਨੇ ਆਖਿਆ ਕਿ ਪਾਰਲੀਆਮੈਂਟ ਦੇ ਇਨ੍ਹਾਂ ਸਮਰਪਿਤ ਤੇ ਪ੍ਰੋਫੈਸ਼ਨਲ ਮੈਂਬਰਜ਼ ਨਾਲ ਕੰਮ ਕਰਨਾ ਉਨ੍ਹਾਂ ਲਈ ਬੜੇ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਆਖਿਆ ਕਿ ਉਹ ਜਾਣਦੇ ਹਨ ਕਿ ਇਹ ਕੰਜ਼ਰਵੇਟਿਵ ਮੂਵਮੈਂਟ ਨੂੰ ਅੱਗੇ ਲਿਜਾਣ ਲਈ ਮਦਦਗਾਰ ਹੋਣਗੇ।
