ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੌਰਿਸ ਜਾਨਸਨ ਨੇ ਐਤਵਾਰ ਨੂੰ ਚੇਤਾਵਨੀ ਦਿੱਤੀ ਕਿ ਦੇਸ਼ ਵਿਚ ਤੇਜ਼ੀ ਨਾਲ ਫੈਲਦੇ ਜਾ ਰਿਹੈ ਕੋਰੋਨਾ ਵਾਇਰਸ ਦੇ ਚਲਦਿਆਂ ਸਖਤ ਫੈਸਲੇ ਲਏ ਜਾ ਸਕਦੇ ਹਨ , ਬੰਦਿਸ਼ਾਂ ਨੂੰ ਹੋਰ ਜ਼ਿਆਦਾ ਦੇਰ ਤੱਕ ਲਾਗੂ ਕੀਤਾ ਜਾ ਸਕਦਾ ਹੈ । ਜੌਹਨਸਨ ਨੇ ਹਾਲਾਂਕਿ ਜ਼ੋਰ ਦੇ ਕੇ ਕਿਹਾ ਕਿ ਉਹਨਾਂ ਨੂੰ ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਸਕੂਲ ਸੁਰੱਖਿਅਤ ਹਨ । ਉਹਨਾਂ ਮਾਪਿਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੇ ਬੱਚਿਆਂ ਨੂੰ ਇੰਗਲੈਂਡ ਦੇ ਉਨ੍ਹਾਂ ਇਲਾਕਿਆਂ ਵਿਚ ਵਾਪਸ ਕਲਾਸਰੂਮ ਵਿਚ ਭੇਜਣ ਜਿੱਥੇ ਉਹ ਕਰ ਸਕਦੇ ਹਨ।
ਉਧਰ ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਨ ਵਾਲੀਆਂ ਯੂਨੀਅਨਾਂ ਨੇ ਕੋਰੋਨਾ ਦੇ ਨਵੇਂ ਰੂਪ ਕਾਰਨ ਸਕੂਲਾਂ ਵਿੱਚ ਘੱਟੋ-ਘੱਟ ਦੋ ਹੋਰ ਹਫ਼ਤਿਆਂ ਲਈ ‘ਰਿਮੋਟ ਪੜਾਈ’ ਵੱਲ ਮੁੜਨ ਦੀ ਮੰਗ ਕੀਤੀ ਹੈ। ਅਧਿਆਪਕ ਮਾਹਿਰਾਂ ਦੇ ਉਹਨਾਂ ਦਾਅਵਿਆਂ ਦਾ ਹਵਾਲਾ ਦੇ ਰਹੇ ਹਨ ਜਿਸ ਅਨੁਸਾਰ ਬ੍ਰਿਟੇਨ ਵਿਚ ਮਿਲਿਆ ਕੋਰੋਨਾ ਵਾਇਰਸ 70 ਪ੍ਰਤੀਸ਼ਤ ਵਧੇਰੇ ਘਾਤਕ ਹੈ।
ਬ੍ਰਿਟੇਨ ਵਿਚ ਇਸ ਸਮੇਂ ਨਵਾਂ ਕੋਰੋਨਾ ਵਾਇਰਸ ਜਿਸਨੂੰ ਬ੍ਰਿਟੇਨ ਵਾਇਰਸ ਵੀ ਕਿਹਾ ਜਾ ਰਿਹਾ ਹੈ, ਇਕ ਗੰਭੀਰ ਦੌਰ ਵਿਚ ਹੈ। ਪਿਛਲੇ ਪੰਜ ਦਿਨਾਂ ਵਿਚ 50,000 ਤੋਂ ਵੱਧ ਨਵੇਂ ਕੋਰੋਨਾ ਵਾਇਰਸ ਸੰਕਰਮਣ ਦੇ ਮਾਮਲੇ ਦਰਜ ਕੀਤੇ ਗਏ। ਸ਼ਨੀਵਾਰ ਨੂੰ, ਇਸ ਨੇ ਰੋਜ਼ਾਨਾ 57,725 ਨਵੇਂ ਕੇਸ ਦਰਜ ਕੀਤੇ, ਜੋ ਇੱਕ ਰਿਕਾਰਡ ਹੈ। ਉਧਰ ਮੌਜੂਦਾ ਹਾਲਾਤ ਬਾਰੇ ਜੋਨਸ ਹੌਪਕਿੰਸ ਯੂਨੀਵਰਸਿਟੀ ਦੁਆਰਾ ਤਿਆਰ ਕੀਤੇ ਅੰਕੜਿਆਂ ਅਨੁਸਾਰ ਬ੍ਰਿਟੇਨ ਵਿਚ ਹਾਲਤ ਗੰਭੀਰ ਹੈ ।
ਲੰਡਨ ਅਤੇ ਦੱਖਣ-ਪੂਰਬੀ ਇੰਗਲੈਂਡ ਵਿਚ ਬਹੁਤ ਸਾਰੇ ਉੱਚ ਪੱਧਰ ਦੀਆਂ ਲਾਗਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਅਜਿਹੀਆਂ ਅਟਕਲਾਂ ਲਗਾਈਆਂ ਜਾ ਰਹੀਆਂ ਹਨ ਕਿ ਵਾਇਰਸ ਨੂੰ ਕਾਬੂ ਵਿਚ ਲਿਆਉਣ ਲਈ ਉਥੇ ਪਾਬੰਦੀਆਂ ਨੂੰ ਹੋਰ ਸਖਤ ਕਰਨਾ ਪਏਗਾ। ਬ੍ਰਿਟਿਸ਼ ਰਾਜਧਾਨੀ ਅਤੇ ਇਸ ਦੇ ਆਸ ਪਾਸ ਦੇ ਕੁਝ ਹਿੱਸਿਆਂ ਵਿਚ, ਪ੍ਰਤੀ 100,000 ਲੋਕਾਂ ਵਿਚ ਤਕਰੀਬਨ 1,000 ਕੇਸ ਸਾਹਮਣੇ ਆਏ ਰਹੇ ਹਨ।
