ਭਾਰਤੀ ਸਾਫਟਵੇਅਰ ਇੰਜੀਨੀਅਰ ਸੁੰਦਰੀ ਨਾਰਾਇਣ ਨੂੰ ਮਿਲੀ USA ਦੀ ਨਾਗਰਿਕਤਾ
ਵ੍ਹਾਈਟ ਹਾਊਸ ਵਿਖੇ ਹੋਇਆ ਵਿਸ਼ੇਸ਼ ਸਮਾਗਮ
ਰਾਸ਼ਟਰਪਤੀ ਟਰੰਪ ਨੇ ਪ੍ਰਦਾਨ ਕੀਤੇ ਅਮਰੀਕੀ ਨਾਗਰਿਕਤਾ ਦੇ ਪ੍ਰਮਾਣ-ਪੱਤਰ
ਵੱਖ-ਵੱਖ ਦੇਸ਼ਾਂ ਦੇ ਨਾਗਰਿਕਾਂ ਨੂੰ ਸ਼ਰਤਾਂ ਪੂਰੀਆਂ ਕਰਨ ‘ਤੇ ਮਿਲੀ ਅਮਰੀਕਾ ਦੀ ਨਾਗਰਿਕਤਾ
ਵਾਸ਼ਿੰਗਟਨ : ਵ੍ਹਾਈਟ ਹਾਊਸ ਵਿਖੇ ਰਿਪਬਲਿਕਨ ਪਾਰਟੀ ਦੇ ਰਾਸ਼ਟਰੀ ਸੰਮੇਲਨ ਦੌਰਾਨ ਇਕ ਭਾਰਤੀ ਸਾਫਟਵੇਅਰ ਇੰਜੀਨੀਅਰ ਸੁੰਦਰੀ ਨਾਰਾਇਣ ਨੂੰ ਅਮਰੀਕਾ ਦੀ ਨਾਗਰਿਕਤਾ ਦਿੱਤੀ ਗਈ ਹੈ।
ਵ੍ਹਾਈਟ ਹਾਊਸ ‘ਚ ਇਕ ਪ੍ਰੋਗਰਾਮ ਦੌਰਾਨ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਉਨ੍ਹਾਂ ਨੂੰ ਸਿਟੀਜ਼ਨ ਸਰਟੀਫਿਕੇਟ ਸੌਂਪਿਆ। ਇਸ ਜ਼ਰੀਏ ਟਰੰਪ ਨੇ ਕਾਨੂੰਨੀ ਤੌਰ ‘ਤੇ ਇਮੀਗ੍ਰੇਸ਼ਨ ਪ੍ਰਤੀ ਆਪਣਾ ਸਮਰਥਨ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਹੈ। ਇਸ ਮੌਕੇ ‘ਤੇ ਟਰੰਪ ਨੇ ਕਿਹਾ, ‘ਨਾਰਾਇਣ ਇਕ ਪ੍ਰਤਿਭਾਸ਼ਾਲੀ ਸਾਫਟਵੇਅਰ ਡੈਵਲਪਰ ਹਨ। ਉਹ ਆਪਣੇ ਪਤੀ ਨਾਲ ਪਿਛਲੇ 13 ਸਾਲਾਂ ਤੋਂ ਅਮਰੀਕਾ ‘ਚ ਹਨ। ਉਨ੍ਹਾਂ ਦੋ ਦੋ ਪਿਆਰੇ ਬੱਚੇ ਵੀ ਹਨ। ਉਨ੍ਹਾਂ ਨੇ ਸਾਡੇ ਨਿਯਮ-ਕਾਨੂੰਨ ‘ਤੇ ਅਮਲ ਕੀਤਾ, ਆਪਣਾ ਇਤਿਹਾਸ ਸਿੱਖਿਆ, ਸਾਡੀਆਂ ਕਦਰਾਂ-ਕੀਮਤਾਂ ਧਾਰਨ ਕੀਤੀਆਂ ਤੇ ਖ਼ੁਦ ਨੂੰ ਸਭ ਤੋਂ ਵੱਧ ਈਮਾਨਦਾਰ ਸਾਬਿਤ ਕੀਤਾ।
Today, President @realDonaldTrump welcomed five of our newest AMERICAN CITIZENS as they took the Oath of Allegiance to the greatest Nation on Earth!
We are one, PROUD American Family! 🇺🇸 pic.twitter.com/ycL7bZeT04
— The White House (@WhiteHouse) August 26, 2020
ਇਸ ਦੌਰਾਨ ਨਾਰਾਇਣ ਨਾਲ ਸੂਡਾਨ, ਬੋਲਵੀਆ, ਲਿਬਨਾਨ ਤੇ ਘਾਨਾ ਦੇ ਵੀ ਇਕ-ਇਕ ਨਾਗਰਿਕ ਨੂੰ ਅਮਰੀਕੀ ਨਾਗਰਿਕਤਾ ਦਿੱਤੀ ਗਈ।
ਦੱਸਣਯੋਗ ਹੈ ਕਿ ਟਰੰਪ ਗ਼ੈਰ ਕਾਨੂੰਨੀ ਤੌਰ ‘ਤੇ ਅਮਰੀਕਾ ‘ਚ ਵੜਨ ਦੇ ਸਖ਼ਤ ਖ਼ਿਲਾਫ਼ ਰਹੇ ਹਨ। ਉਨ੍ਹਾਂ ਨੇ 2016 ਦੀਆਂ ਚੋਣਾਂ ‘ਚ ਵੀ ਇਸ ਨੂੰ ਮੁੱਦਾ ਬਣਾਇਆ ਸੀ ਤੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਇਸ ਨੂੰ ਰੋਕਣ ਲਈ ਸਖ਼ਤ ਨੀਤੀ ਅਪਣਾਈ। ਡੈਮੋਕ੍ਰੇਟਿਕ ਪਾਰਟੀ ਇਸ ਮੁੱਦੇ ‘ਤੇ ਟਰੰਪ ਨੂੰ ਲਗਾਤਾਰ ਘੇਰ ਰਹੀ ਹੈ। ਉੱਧਰ ਵਿਰੋਧੀ ਧਿਰਾਂ ਇਹ ਇਲਜਾਮ ਲਗਾ ਰਹੀਆਂ ਹਨ ਕਿ ਰਾਸ਼ਟਰਪਤੀ ਟਰੰਪ ਚੋਣਾਂ ਦੇ ਮੱਦੇਨਜ਼ਰ ਅਜਿਹੇ ਕਈ ਫੈਸਲੇ ਲੈ ਰਹੇ ਹਨ ਜਿਹੜੇ ਅਮਰੀਕਾ ਦੇ ਹਿੱਤ ਵਿੱਚ ਨਹੀਂ। ਉਧਰ ਭਾਰਤੀ ਅਮਰੀਕੀਆਂ ਨੂੰ ਆਪਣੇ ਨਾਲ ਜੋੜਨ ਲਈ ਟਰੰਪ ਅਤੇ ਬਿਡੇਨ ਧੜੇ ਕੋਈ ਕਸਰ ਨਹੀਂ ਛੱਡ ਰਹੇ ।
