ਓਟਾਵਾ : ਕੈਨੇਡਾ ਵਿੱਚ ਕੋਰੋਨਾ ਵਾਇਰਸ ਕਾਰਨ ਜਾਨ ਗੁਆਉਣ ਵਾਲਿਆਂ ਦੀ ਸੰਖਿਆ 20,000 ਤੋਂ ਪਾਰ ਪਹੁੰਚ ਗਈ। ਐਤਵਾਰ ਨੂੰ ਕਿਊਬੈਕ ਸੂਬੇ ਵੱਲੋਂ 31 ਨਵੀਂਆਂ ਮੌਤਾਂ ਦੀ ਘੋਸ਼ਣਾ ਤੋਂ ਬਾਅਦ ਇਹ ਗਿਣਤੀ ਉਭਰੀ। ਕੈਨੇਡਾ ਵਿੱਚ ਹੁਣ ਕੁੱਲ 20,020 ਵਿਅਕਤੀ ਇਸ ਵਾਇਰਸ ਕਾਰਨ ਮਾਰੇ ਜਾ ਚੁੱਕੇ ਹਨ।
ਕੈਨੇਡਾ ਵਿੱਚ 7,78,123 ਵਿਅਕਤੀਆਂ ਨੂੰ ਕੋਰੋਨਾ ਵਾਇਰਸ ਹੋਣ ਦੀ ਪੁਸ਼ਟੀ ਹੋਈ ਹੈ। ਐਤਵਾਰ ਨੂੰ 3,701 ਹੋਰ ਮਾਮਲੇ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿੱਚ ਬਹੁਗਿਣਤੀ 1,848 ਕੇਸ ਓਂਟਾਰੀਓ ਸੂਬੇ ਤੋਂ ਆਏ ਹਨ।
ਹੁਣ ਤੱਕ ਸਿਹਤ ਅਧਿਕਾਰੀ 9,52,296 ਕੋਵਿਡ-19 ਟੀਕਾ ਖੁਰਾਕਾਂ (ਵੈਕਸੀਨ) ਦਾ ਪ੍ਰਬੰਧ ਕਰ ਚੁੱਕੇ ਹਨ ਜਦਕਿ ਦੇਸ਼ ਭਰ ਵਿੱਚ 22 ਮਿਲੀਅਨ ਤੋਂ ਵੱਧ ਟੈਸਟ ਕਰਵਾਏ ਗਏ ਹਨ।
ਕੈਨੇਡਾ ਦੀ ਮੁੱਖ ਜਨਤਕ ਸਿਹਤ ਅਧਿਕਾਰੀ ਡਾ. ਥੈਰੇਸਾ ਟਾਮ ਅਨੁਸਾਰ ਰੋਜ਼ਾਨਾ ਨਵੇਂ ਕੇਸਾਂ ਦੀ ਗਿਣਤੀ ਦਾ ਰੁਝਾਨ ਹੇਠਾਂ ਵੱਲ ਹੈ, ਪਰੰਤੂ ਮੌਜੂਦਾ ਕੋਵਿਡ-19 ਦੀਆਂ ਪਾਬੰਦੀਆਂ ਅਤੇ ਉਪਰਾਲਿਆਂ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਢਿੱਲ ਨਾ ਦਿੱਤੇ ਜਾਣ ਦੀ ਸਲਾਹ ਦਿੱਤੀ ਹੈ । ਅਸਾਨ ਕਰਨ ਦੇ ਵਿਰੁੱਧ ਸਲਾਹ ਦਿੱਤੀ ਗਈ ਹੈ।
ਦੱਸਣਯੋਗ ਹੈ ਕਿ ਕੈਨੇਡਾ ਵਿਚ ਹਵਾਈ ਯਾਤਰਾ ਪਾਬੰਦੀਆਂ ਪਹਿਲਾਂ ਹੀ ਲਾਗੂ ਕੀਤੀਆਂ ਜਾ ਚੁੱਕੀਆਂ ਹਨ। ਬੀਤੇ ਸ਼ੁੱਕਰਵਾਰ ਨੂੰ, ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਐਲਾਨ ਕੀਤਾ ਕਿ ਏਅਰ ਕਨੇਡਾ, ਵੈਸਟਜੈੱਟ, ਸਨਵਿੰਗ ਅਤੇ ਏਅਰ ਟ੍ਰਾਂਸੈਟ ਸਾਰੇ 30 ਅਪ੍ਰੈਲ ਤੱਕ ਕੈਰੇਬੀਆਈ ਟਿਕਾਣਿਆਂ ਅਤੇ ਮੈਕਸੀਕੋ ਲਈ ਆਪਣੀਆਂ ਹਵਾਈ ਸੇਵਾਵਾਂ ਰੱਦ ਰੱਖਣਗੇ ।
