ਕੋਰੋਨਾ ਤੋਂ ਬਾਅਦ ਫਿਰ ਚੀਨ ਤੋਂ ਆਈ ਇਕ ਖਬਰ ਨੇ ਸਾਰਿਆਂ ਦੀ ਚਿੰਤਾ ਵਧਾ ਦਿਤੀ ਹੈ। ਚੀਨ ਤੋਂ ਆਇਆ ਇਕ ਹੋਰ ਵਾਇਰਸ ਜੋ ਭਾਰਤ ‘ਚ ਬੀਮਾਰੀਆਂ ਫੈਲਾ ਸਕਦਾ ਹੈ।
ਇੰਡੀਅਨ ਕੌਂਸਲ ਆਫ ਮੈਡੀਕਲ ਰਿਸਰਚ(ICMR)ਨੇ ਚਿਤਾਵਨੀ ਦਿਤੀ ਹੈ ਕਿ ਕੈਟ ਕਿਊ ਵਾਇਰਸ (CQ) ਭਾਰਤ ‘ਚ ਬੁਖਾਰ ਨਾਲ ਸਬੰਧਿਤ ਕਈ ਹੋਰ ਬਿਮਾਰੀਆਂ ਫੈਲਾ ਸਕਦਾ ਹੈ।ਕੋਰੋਨਾ ਵਾਇਰਸ ਵੀ ਚੀਨ ਤੋਂ ਹੀ ਫੈਲਿਆ ਹੈ ਜਿਸ ਨਾਲ ਤਕਰੀਬਨ 10 ਲੱਖ ਲੋਕਾਂ ਦੀ ਮੌਤ ਹੋ ਗਈ ਹੈ।
ICMR ਨੇ ਆਪਣੇ ਹਾਲ ਹੀ ‘ਚ ਪ੍ਰਕਾਸ਼ਿਤ ਇਕ ਸੋਧ ‘ਚ ਦਾਅਵਾ ਕੀਤਾ ਸੀ ਕਿ ਖੁਨ ਚੁਸਣ ਵਾਲੇ ਜੀਵਾਂ (ਮਛੱਰ) ਤੋਂ ਇਨਸਾਨਾਂ ‘ਚ ਫੈਲਣ ਵਾਲਾ ਇਹ ਵਾਇਰਸ ਮੈਨੇਜਾਇਟਸ ਅਤੇ ਬੱਚਿਆਂ ‘ਚ ਦਿਮਾਗੀ ਬੁਖਾਰ ਜਿਹੀਆਂ ਬੀਮਾਰੀਆਂ ਫੈਲਾ ਸਕਦਾ ਹੈ। ICMR ਦੇ ਮੁਤਾਬਕ ਭਾਰਤ ‘ਚ ਪਾਏ ਜਾਣ ਵਾਲੇ ਮੱਛਰ ਇਸ CQ ਵਾਇਰਸ ਨੂੰ ਫੈਲਾਉਣ ‘ਚ ਪੂਰੀ ਤਰਾਂ ਅਨੁਕੂਲ ਹਨ।
PUNE ਦੀ ਨੈਸ਼ਨਲ ਇੰਸਟੀਚਿਉਟ ਆਫ ਵਾਇਰੋਲਾਜੀ ਦੇ ਵਿਗਿਆਨੀਆਂ ਨੇ ਦੇਸ਼ ਭਰ ‘ਚ 833 ਲੋਕਾਂ ਦਾ ਸੀਰਮ ਟੈਸਟ ਕੀਤਾ। ਜਿੰਨ੍ਹਾਂ ਚੋਂ 2 ਲੋਕਾਂ ‘ਚ CQ ਵਾਇਰਸ ਦੀ ਐਂਟੀਬਾਡੀ ਮਿਲੀ ਹੈ। ਯਾਨੀ ਕਿ ਦੋ ਵਿਅਕਤੀ ਇਸ ਵਾਇਰਸ ਦੀ ਲਪੇਟ ‘ਚ ਆਏ ਸਨ।
ਦਸਿਆ ਜਾ ਰਿਹਾ ਹੈ ਕਿ ਇਹ ਸੈਂਪਲ ਕਰਨਾਟਕ ‘ਚ 2014 ਅਤੇ 2017 ‘ਚ ਲਏ ਗਏ ਸਨ। ਵਿਗਿਆਨੀਆਂ ਨੇ ਇਸਦੇ ਨਾਲ ਹੀ ਭਾਰਤ ‘ਚ ਪਾਏ ਜਾਣ ਵਾਲੇ ਮੱਛਰਾਂ ‘ਤੇ ਵੀ ਟੈਸਟ ਕੀਤਾ, ਜਿਸ ਤੋਂ ਪਤਾ ਲਗਿਆ ਕਿ ਭਾਰਤ ਦੇ ਮੱਛਰ CQ ਵਾਇਰਸ ਦੇ ਪ੍ਰਤੀ ਸੰਵੇਦਨਸ਼ੀਲ ਹਨ।
ਸੰਸਥਾ ਨੇ ਦਸਿਆ ਹੈ ਕਿ CQ ਵਾਇਰਸ ਸੂਰਾਂ ‘ਚ ਪਾਇਆ ਜਾਂਦਾ ਹੈ ਅਤੇ ਚੀਨ ਦੇ ਪਾਲਤੂ ਸੂਰਾਂ ‘ਚ ਇਸ ਵਾਇਰਸ ਖਿਲਾਫ ਪੈਦਾ ਹੋਈ ਐਂਟੀਬਾਡੀ ਪਾਈ ਗਈ ਹੈ।
