ਮਿਸੀਸਾਗਾ : ਪੀਲ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਵੱਲੋਂ ਮਿਸੀਸਾਗਾ ਵਿੱਚ ਮਾਰੀ ਗਈ 81 ਸਾਲਾ ਮਹਿਲਾ ਦੇ ਕਥਿਤ ਕਤਲ ਦੇ ਦੋਸ਼ ਵਿੱਚ ਉਸ ਦੇ 86 ਸਾਲਾ ਪਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ|
ਪੁਲਿਸ ਨੇ ਕਿਹਾ ਕਿ ਕੱਲ੍ਹ ਸਵੇਰੇ ਕੇਅਰ ਪ੍ਰੋਵਾਈਡਰ ਨੇ ਕੈਨੇਫ ਡਰਾਈਵ ‘ਤੇ ਸਥਿਤ ਰਿਹਾਇਸ਼ੀ ਬਿਲਡਿੰਗ ਵਿੱਚ ਇੱਕ ਬਜ਼ੁਰਗ ਮਹਿਲਾ ਨੂੰ ਮ੍ਰਿਤਕ ਪਾਇਆ| ਪੁਲਿਸ ਵੱਲੋਂ ਮਹਿਲਾ ਦੀ ਪਛਾਣ ਮਿਸੀਸਾਗਾ ਦੀ 81 ਸਾਲਾ ਮੈਰੀਅਨ ਵਾਲੈਸ ਵਜੋਂ ਕੀਤੀ ਗਈ ਹੈ| ਬਾਅਦ ਵਿੱਚ ਦਿਨ ਵੇਲੇ ਪੁਲਿਸ ਵੱਲੋਂ ਮਿਸੀਸਗਾ ਦੇ ਹੀ 86 ਸਾਲਾਂ ਲਾਅਟਨ ਵਾਲੈਸ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ| ਇਸ ਘਟਨਾ ਦੇ ਸਬੰਧ ਵਿੱਚ ਉਸ ਉੱਤੇ ਫਰਸਟ ਡਿਗਰੀ ਮਰਡਰ ਦੇ ਦੋਸ਼ ਲਾਏ ਗਏ ਹਨ|
ਪੁਲਿਸ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਉਹ ਕਿਸੇ ਹੋਰ ਮਸ਼ਕੂਕ ਦੀ ਭਾਲ ਨਹੀਂ ਕਰ ਰਹੇ ਹਨ| ਉਨ੍ਹਾਂ ਕਿਹਾ ਕਿ ਕਤਲ ਦੇ ਸਮੇਂ ਮਹਿਲਾ ਤੇ ਮਸ਼ਕੂਕ ਵਿਆਹੁਤਾ ਜ਼ਿੰਦਗੀ ਹੀ ਬਤੀਤ ਕਰ ਰਹੇ ਸਨ| ਮ੍ਰਿਤਕ ਮਹਿਲਾ ਦੇ ਪਤੀ ਨੂੰ ਜ਼ਮਾਨਤ ਦੀ ਸੁਣਵਾਈ ਲਈ ਹਿਰਾਸਤ ਵਿੱਚ ਰੱਖਿਆ ਗਿਆ ਹੈ, ਜੋ ਕਿ ਅੱਜ ਬਰੈਂਪਟਨ ਵਿੱਚ ਹੋਵੇਗੀ।
