ਹੈਮਿਲਟਨ : ਹੈਮਿਲਟਨ ਦੇ ਇੱਕ ਅਪਾਰਟਮੈਂਟ ਵਿੱਚ ਛੁਰੇਬਾਜ਼ੀ ਦੀ ਵਾਪਰੀ ਘਟਨਾ ਤੋਂ ਬਾਅਦ ਇੱਕ ਵਿਅਕਤੀ ਨੂੰ ਕਤਲ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ ਵਿੱਚ ਚਾਰਜ ਕੀਤਾ ਗਿਆ ਹੈ।
ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਕੁਈਨ ਤੇ ਮੇਨ ਸਟਰੀਟਸ ਲਾਗੇ ਬੋਲਡ ਸਟਰੀਟ ਉੱਤੇ ਸਥਿਤ ਇੱਕ ਘਰ ਵਿੱਚ ਰਾਤੀਂ 1:30 ਵਜੇ ਬੁਲਾਇਆ ਗਿਆ | ਘਰ ਵਿੱਚ ਕੁੱਝ ਗੜਬੜੀ ਦੀ ਰਿਪੋਰਟ ਮਿਲੀ ਸੀ | ਜਾਂਚਕਾਰਾਂ ਅਨੁਸਾਰ ਮੌਕੇ ਉੱਤੇ ਪਹੁੰਚੇ ਅਧਿਕਾਰੀਆਂ ਨੂੰ ਲੜਾਈ ਅਤੇ ਖੂਨ ਖਰਾਬੇ ਦੇ ਸੰਕੇਤ ਤਾਂ ਮਿਲੇ ਪਰ ਘਰ ਵਿੱਚ ਕੋਈ ਨਹੀਂ ਮਿਲਿਆ।
ਦਸ ਮਿੰਟ ਬਾਅਦ ਹੀ ਇੱਕ ਵਿਅਕਤੀ ਢਿੱਡ ਵਿੱਚ ਹੋਏ ਜ਼ਖ਼ਮਾਂ ਦਾ ਇਲਾਜ ਕਰਵਾਉਣ ਲਈ ਹਸਪਤਾਲ ਪਹੁੰਚ ਗਿਆ। ਉਸ ਵਿਅਕਤੀ ਨੇ ਜਾਂਚਕਾਰਾਂ ਨੂੰ ਦੱਸਿਆ ਕਿ ਉਸ ਦੇ ਦੋਸਤ ਨੇ ਝਗੜੇ ਦੌਰਾਨ ਉਸ ਦੇ ਛੁਰਾ ਮਾਰ ਦਿੱਤਾ | ਉਸਨੇ ਕਿਹਾ ਕਿ ਉਸ ਉੱਤੇ ਹਮਲਾ ਕਰਨ ਵਾਲਾ ਵਿਅਕਤੀ ਵੀ ਉਸੇ ਹਸਪਤਾਲ ਵਿੱਚ ਇਲਾਜ ਕਰਵਾ ਰਿਹਾ ਹੈ । ਮੌਕੇ ਉੱਤੇ ਮਿਲੇ ਸਬੂਤਾਂ ਦੀ ਜਾਂਚ ਤੋਂ ਬਾਅਦ ਦੂਜੇ ਵਿਅਕਤੀ ਨੂੰ ਚਾਰਜ ਕੀਤਾ ਗਿਆ ਹੈ। ਮਸ਼ਕੂਕ ਨੂੰ ਮਾਮੂਲੀ ਸੱਟਾਂ ਹੀ ਲੱਗੀਆਂ ਹਨ | ਮਸ਼ਕੂਕ ਦੀ ਪਛਾਣ ਹੈਮਿਲਟਨ ਵਾਸੀ 31 ਸਾਲਾ ਐਰਨ ਰੋਜੇਕ ਵਜੋਂ ਹੋਈ | ਇਸ ਸਮੇਂ ਉਹ ਪੁਲਿਸ ਹਿਰਾਸਤ ਵਿੱਚ ਹੀ ਹੈ।
