ਹਿਊਸਟਨ : ਭਾਰਤੀ ਮੂਲ ਦੀ ਸੋਨਲ ਭੂਚਰ ਦੇ ਨਾਂ ‘ਤੇ ਟੈਕਸਾਸ ‘ਚ ਇੱਕ ਸਕੂਲ ਦਾ ਨਾਂ ਰੱਖਿਆ ਜਾਵੇਗਾ। ਅਮਰੀਕਾ ‘ਚ ਕਈ ਸਾਲਾਂ ਤਕ ਸਮਾਜ ਸੇਵਾ ਦੇ ਖੇਤਰ ‘ਚ ਬਿਹਤਰੀਨ ਸੇਵਾਵਾਂ ਦੇਣ ਵਾਲੀ ਸੋਨਲ ਦੀ 58 ਸਾਲ ਦੀ ਉਮਰ ‘ਚ 2019 ‘ਚ ਕੈਂਸਰ ਨਾਲ ਮੌਤ ਹੋ ਗਈ ਸੀ। ਸਕੂਲ ਦਾ ਨਾਂ ਸੋਨਲ ਭੂਚਰ ਦੇ ਨਾਂ ‘ਤੇ ਰੱਖਣ ਬਾਰੇ ਫੋਰਟ ਬੈਂਡ ਇੰਡੀਪੈਂਡੇਂਟ ਸਕੂਲ ਡਿਸਟ੍ਰਿਕਟ ਬੋਰਡ ਦੇ ਟਰੱਸਟੀਜ਼ ਨੇ ਫ਼ੈਸਲਾ ਸਰਬਸੰਮਤੀ ਨਾਲ ਲਿਆ ਹੈ। ਸਕੂਲ 2023 ‘ਚ ਰਿਵਰਸਟੋਰ ਕਮਿਊਨਿਟੀ ‘ਚ ਸ਼ੁਰੂ ਹੋ ਜਾਵੇਗਾ।
ਮੂਲ ਰੂਪ ‘ਚ ਮੁੰਬਈ ਦੀ ਰਹਿਣ ਵਾਲੀ ਸੋਨਲ ਪੇਸ਼ੇ ਤੋਂ ਫਿਜ਼ੀਓਥੈਰੇਪਿਸਟ ਸੀ। ਉਨ੍ਹਾਂ ਨੇ ਫਿਜ਼ੀਕਲ ਥੈਰੇਪੀ ‘ਚ ਗ੍ਰੈਜੂਏਸ਼ਨ ਦੀ ਡਿਗਰੀ ਬੰਬੇ ਯੂਨੀਵਰਸਿਟੀ ਤੋਂ ਹਾਸਲ ਕੀਤੀ ਸੀ। 1984 ‘ਚ ਉਹ ਆਪਣੇ ਪਤੀ ਸੁਬੋਧ ਭੂਚਰ ਨਾਲ ਹਿਊਸਟਨ ਚਲੀ ਗਈ ਸੀ। ਉਥੇ ਆਪਣੇ ਕੰਮ ਨਾਲ ਹੀ ਸੋਨਲ ਸਮਾਜ ਸੇਵਾ ਦੇ ਖੇਤਰ ‘ਚ ਸਰਗਰਮ ਹੋ ਗਈ।
ਸੋਨਲ ਭੂਚਰ ਛੇ ਸਾਲ ਤਕ ਫੋਰਡ ਬੈਂਡ ਆਈਐੱਸਡੀ ‘ਚ ਟਰੱਸਟੀ ਰਹੀ ਤੇ ਦੋ ਸਾਲ ਤਕ ਪ੍ਰਧਾਨ ਰਹੀ। 2015 ‘ਚ ਟੈਕਸਾਸ ਦੇ ਗਵਰਨਰ ਨੇ ਵਨ ਸਟਾਰ ਨੈਸ਼ਨਲ ਸਰਵਿਸ ਕਮਿਸ਼ਨ ਬੋਰਡ ‘ਚ ਮਹੱਤਵਪੂਰਨ ਜ਼ਿੰਮੇਵਾਰੀ ਦੇ ਦਿੱਤੀ। ਇਨ੍ਹਾਂ ਸਾਰੇ ਸੰਸਥਾਵਾਂ ‘ਚ ਉਨ੍ਹਾਂ ਨੇ ਆਪਣੀ ਵੱਖਰੀ ਪਛਾਣ ਬਣਾ ਲਈ ਸੀ।