ਓਨਟਾਰੀਓ ਯੌਰਕ ਪੁਲਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਨਿਊਮਾਰਕਿਟ ਤੋਂ ਲਾਪਤਾ 14 ਸਾਲਾ ਲੜਕੀ ਨੂੰ ਲੈ ਕੇ ਜਾਂਚਕਾਰ ਕਾਫੀ ਚਿੰਤਤ ਹਨ। ਇੱਕ ਪ੍ਰੈੱਸ ਰਲੀਜ਼ ਵਿੱਚ ਅਧਿਕਾਰੀਆਂ ਨੇ ਦੱਸਿਆ ਕਿ ਫੈਲੀਸ਼ਾ ਬ੍ਰੈਡਲੇ ਨੂੰ ਆਖਰੀ ਵਾਰੀ ਬੁੱਧਵਾਰ ਨੂੰ ਰਾਤੀਂ 8:00 ਵਜੇ ਉਦੋਂ ਵੇਖਿਆ ਗਿਆ ਸੀ ਜਦੋਂ ਉਸ ਨੇ ਬਾਥਰਸਟ ਸਟਰੀਟ ਤੇ ਮੁਲੌਕ ਡਰਾਈਵ ਇਲਾਕੇ ਵਿੱਚ ਮੈਕਾਈਵਰ ਬੋਲੀਵੀਆਰਡ ਸਥਿਤ ਆਪਣਾ ਘਰ ਛੱਡਿਆ ਸੀ।
ਪੁਲਿਸ ਨੇ ਦੱਸਿਆ ਕਿ ਬ੍ਰੈਡਲੇ ਨੇ ਘਰ ਤੋਂ ਬਾਹਰ ਜਾਣ ਤੋਂ ਬਾਅਦ ਇੱਕ ਵਾਰੀ ਵੀ ਆਪਣੇ ਪਰਿਵਾਰ ਨਾਲ ਸੰਪਰਕ ਨਹੀਂ ਕੀਤਾ, ਜੋ ਕਿ ਉਸ ਦੇ ਸੁਭਾਅ ਤੋਂ ਬਿਲਕੁਲ ਉਲਟ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਪੁਲਿਸ ਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਉਸ ਦੀ ਸੇਫਟੀ ਨੂੰ ਲੈ ਕੇ ਕਾਫੀ ਚਿੰਤਾ ਹੈ। ਬ੍ਰੈਡਲੇ ਬਾਰੇ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਉਸ ਦਾ ਕੱਦ 5 ਫੁੱਟ 2 ਇੰਚ, ਉਸ ਦੇ ਵਾਲਾ ਦਾ ਰੰਗ ਭੂਰਾ ਹੈ ਤੇ ਉਸ ਨੇ ਘਰ ਤੋਂ ਨਿਕਲਣ ਸਮੇਂ ਪੋਨੀਟੇਲ ਕੀਤੀ ਹੋਈ ਸੀ।
ਪੁਲਿਸ ਨੇ ਜਾਣਕਾਰੀ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਅਪੀਲ ਕੀਤੀ ਹੈ ਕਿ ਉਹ ਜਾਂਚਕਰਤਾਵਾਂ ਨਾਲ ਸੰਪਰਕ ਕਰਨ।