ਵਾਸ਼ਿੰਗਟਨ : ਰਾਸ਼ਟਰਪਤੀ ਚੋਣਾਂ ਵਿੱਚ ਬੁਰੀ ਤਰ੍ਹਾਂ ਹਾਰ ਕੇ ਵੀ ਆਪਣੀ ਹਾਰ ਨੂੰ ਸਵੀਕਾਰ ਨਾ ਕਰਨ ਵਾਲੇ ਡੋਨਾਲਡ ਟਰੰਪ ਦੀ ਜ਼ਿੱਦ ਨੇ ਉਹਨਾਂ ਦੇ ਨਾਂ ਇੱਕ ਅਜਿਹਾ ਅਧਿਆਏ ਜੋੜ ਦਿੱਤਾ ਹੈ, ਜਿਸਦੀ ਅਮਰੀਕਾ ਦੇ ਇਤਿਹਾਸ ਵਿੱਚ ਹਮੇਸ਼ਾ ਅਲੋਚਨਾ ਕੀਤੀ ਜਾਵੇਗੀ। ਬੀਤੇ ਦਿਨ ਟਰੰਪ ਸਮਰਥਕਾਂ ਨੇ ਵਾਸ਼ਿੰਗਟਨ ਸਥਿਤ ਕੈਪਿਟਲ ਬਿਲਡਿੰਗ ‘ਚ ਜੰਮ ਕੇ ਭੰਨ ਤੋੜ ਕਰਦੇ ਹੋਏ ਹੰਗਾਮਾ ਕੀਤਾ। ਸੁਰੱਖਿਆ ਕਰਮੀਆਂ ਅਤੇ ਟਰੰਪ ਸਮਰਥਕਾਂ ਦਰਮਿਆਨ ਹੋਈਆਂ ਹਿੰਸਕ ਝੜਪਾਂ ਵਿਚ ਚਾਰ ਜਣਿਆਂ ਦੀ ਜਾਨ ਚਲੀ ਗਈ । ਇਹਨਾਂ ਹਿੰਸਕ ਝੜਪਾਂ ਪਿੱਛੇ ਕਾਰਨ ਟਰੰਪ ਦੇ ਭੜਕਾਊ ਭਾਸ਼ਣ ਨੂੰ ਮੰਨਿਆ ਜਾ ਰਿਹਾ ਹੈ,ਜਿਸ ਨੂੰ ਸੁਣਨ ਤੋਂ ਬਾਅਦ ਟਰੰਪ ਸਮਰਥਕ ਭੜਕ ਗਏ ਅਤੇ ਉਹਨਾਂ ਨੇ ਕੈਪਿਟਲ ਬਿਲਡਿੰਗ ‘ਤੇ ਧਾਵਾ ਬੋਲ ਦਿੱਤਾ । ਇਸ ਹਿੰਸਕ ਝੜਪ ਦੇ ਕਾਰਨ ਦੁਨੀਆ ਭਰ ਵਿਚ ਡੋਨਾਲਡ ਟਰੰਪ ਦੀ ਨਿਖੇਧੀ ਕੀਤੀ ਜਾ ਰਹੀ ਹੈ ।
ਟਰੰਪ ਦੇ ਭੜਕਾਊ ਭਾਸ਼ਣ ਕਾਰਨ ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਅਕਾਊਂਟ ‘ਤੇ ਅਣਮਿੱਥੇ ਸਮੇਂ ਲਈ ਪਾਬੰਦੀ ਲਗਾ ਦਿੱਤੀ ਹੈ। ਫੇਸਬੁੱਕ ਦੇ ਮੁਖੀ ਮਾਰਕ ਜੁਕਰਬਰਗ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ ਹੈ। ਇਸ ਤੋਂ ਪਹਿਲਾਂ ਫੇਸਬੁੱਕ ਨੇ ਪਾਲਿਸੀ ਦੀ ਉਲੰਘਣਾ ਕਾਰਨ ਰਾਸ਼ਟਰਪਤੀ ਦੇ ਅਕਾਊਂਟ ‘ਤੇ 24 ਘੰਟੇ ਦੀ ਰੋਕ ਲਗਾਈ ਸੀ। ਦਰਅਸਲ ਬੀਤੇ ਦਿਨ ਵਾਸ਼ਿੰਗਟਨ ਦੇ ਕੈਪਿਟਲ ਵਿਚ ਹਿੰਸਾ ਪਿੱਛੋਂ ਟਵਿੱਟਰ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਨੇ ਆਪਣੇ-ਆਪਣੇ ਪਲੇਟਫਾਰਮਾਂ ‘ਤੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਅਕਾਊਂਟਸ ਫ੍ਰੀਜ਼ ਕਰ ਦਿੱਤੇ ਸਨ । ਹਿੰਸਾ ਦੌਰਾਨ ਟਰੰਪ ਦੇ ਆਧਾਰਹੀਣ ਦਾਅਵਿਆਂ ਨੂੰ ਰੋਕਣ ਲਈ ਇਹ ਕਦਮ ਚੁੱਕਿਆ ਗਿਆ।
ਟਵਿੱਟਰ ਨੇ ਟਰੰਪ ਦੇ ਅਕਾਊਂਟ ਨੂੰ 12 ਘੰਟੇ ਲਈ ਮੁਅੱਤਲ ਕੀਤਾ ਅਤੇ ਉਨ੍ਹਾਂ ਦੇ ਇਕ ਵੀਡੀਓ ਸੰਦੇਸ਼ ਸਮੇਤ ਤਿੰਨ ਟਵੀਟ ਨੂੰ ਵੀ ਪੂਰੀ ਤਰ੍ਹਾਂ ਬਲਾਕ ਕਰ ਦਿੱਤਾ। ਟਵਿੱਟਰ ਨੇ ਇਕ ਬਿਆਨ ਵਿਚ ਕਿਹਾ ਕਿ ਵਾਸ਼ਿੰਗਟਨ ਡੀਸੀ ਵਿਚ ਜਾਰੀ ਹਿੰਸਾ ਦੇ ਮੱਦੇਨਜ਼ਰ ਅਸੀਂ ਡੋਨਾਲਡ ਟਰੰਪ ਦੇ ਤਿੰਨ ਟਵੀਟ ਨੂੰ ਹਟਾ ਦਿੱਤਾ। ਉਹ ਸਾਡੀਆਂ ਨੀਤੀਆਂ ਦਾ ਉਲੰਘਣ ਕਰਨ ਵਾਲੇ ਸਨ। ਟਵਿੱਟਰ ਨੇ ਇਹ ਚਿਤਾਵਨੀ ਵੀ ਦਿੱਤੀ ਕਿ ਜੇਕਰ ਉਸ ਦੀਆਂ ਨੀਤੀਆਂ ਦਾ ਉਲੰਘਣ ਜਾਰੀ ਰਿਹਾ ਤਾਂ ਟਰੰਪ ਦੇ ਅਕਾਊਂਟ ਨੂੰ ਹਮੇਸ਼ਾ ਲਈ ਹਟਾ ਦਿੱਤਾ ਜਾਵੇਗਾ।
ਉਧਰ, ਫੇਸਬੁੱਕ ਨੇ ਵੀ ਟਰੰਪ ਦੇ ਅਕਾਊਂਟ ‘ਤੇ 24 ਘੰਟੇ ਲਈ ਰੋਕ ਲਗਾਈ ਸੀ, ਜਿਹੜੀ ਹੁਣ ਅਣਮਿੱਥੇ ਸਮੇਂ ਲਈ ਵਧਾ ਦਿੱਤੀ ਗਈ ਹੈ। ਇਸ ਦਿੱਗਜ ਇੰਟਰਨੈੱਟ ਕੰਪਨੀ ਨੇ ਆਪਣੀਆਂ ਦੋ ਨੀਤੀਆਂ ਦੇ ਉਲੰਘਣ ‘ਤੇ ਇਹ ਕਾਰਵਾਈ ਕੀਤੀ। ਫੇਸਬੁੱਕ ਅਤੇ ਯੂਟਿਊਬ ਨੇ ਟਰੰਪ ਦੇ ਅਕਾਊਂਟਸ ਤੋਂ ਵੀਡੀਓ ਵੀ ਹਟਾ ਦਿੱਤੇ। ਟਰੰਪ ਨੇ ਸੰਸਦ ਵਿਚ ਸਮਰਥਕਾਂ ਦੇ ਦਾਖ਼ਲ ਹੋਣ ‘ਤੇ ਇਕ ਵੀਡੀਓ ਪੋਸਟ ਕੀਤਾ ਸੀ। ਇਸ ਵਿਚ ਉਨ੍ਹਾਂ ਕਿਹਾ ਕਿ ਮੈਂ ਤੁਹਾਡੇ ਦਰਦ ਨੂੰ ਸਮਝਦਾ ਹਾਂ। ਮੈਂ ਜਾਣਦਾ ਹਾਂ ਕਿ ਤੁਸੀਂ ਲੋਕ ਦੁਖੀ ਹੋ। ਇਹ ਹੇਰਾਫੇਰੀ ਵਾਲੀ ਚੋਣ ਸੀ ਪ੍ਰੰਤੂ ਅਸੀਂ ਅਜਿਹਾ ਨਹੀਂ ਹੋਣ ਦੇ ਸਕਦੇ ਹਾਂ। ਸਾਨੂੰ ਸ਼ਾਂਤੀ ਰੱਖਣੀ ਹੋਵੇਗੀ। ਇਸ ਲਈ ਘਰ ਪਰਤ ਜਾਉ। ਫੇਸਬੁੱਕ ਦੀ ਮਾਲਕੀ ਵਾਲੇ ਇੰਸਟਾਗ੍ਰਾਮ ਨੇ ਵੀ ਟਰੰਪ ਦੇ ਅਕਾਊਂਟ ਨੂੰ ਅਣਮਿੱਥੇ ਸਮੇਂ ਲਈ ਬਲਾਕ ਕਰ ਦਿੱਤਾ। ਦੱਸਣਯੋਗ ਹੈ ਕਿ ਟਵਿੱਟਰ ਅਤੇ ਫੇਸਬੁੱਕ ਟਰੰਪ ਦੇ ਟਵੀਟ ਅਤੇ ਪੋਸਟ ਨੂੰ ਪਹਿਲੇ ਵੀ ਬਲਾਕ ਕਰ ਚੁੱਕੇ ਹਨ।