ਐਬਟਸਫੋਰਡ ਪੁਲਿਸ ਦੇ ਜਾਂਚਕਰਤਾ ਇੱਕ ਆਦਮੀ ਦੀ ਬੱਸ ਨਿਗਰਾਨੀ ਦੀਆਂ ਤਸਵੀਰਾਂ ਜਾਰੀ ਕਰ ਰਹੇ ਹਨ ਜਿਸਨੇ ਇੱਕ ਬੀਸੀ ਟ੍ਰਾਂਜ਼ਿਟ ਬੱਸ ਵਿੱਚ ਇੱਕ 17 ਸਾਲ ਦੀ ਲੜਕੀ ਨਾਲ ਸਰੀਰਕ ਛੇੜਛਾੜ ਕੀਤੀ ਸੀ। ਜਾਂਚ ਅਧੀਨ ਇਹ ਘਟਨਾ ਸੈਂਟਰਲ ਐਬਟਸਫੋਰਡ ਵਿਚ ਸ਼ਨੀਵਾਰ 3 ਅਕਤੂਬਰ 2020 ਨੂੰ ਸ਼ਾਮ 6:40 ਵਜੇ ਵਾਪਰੀ।
ਪੁਲਿਸ ਨੇ ਦੱਸਿਆ ਕਿ ਸ਼ਾਮ ਲਗਭਗ ਸੱਤ ਵਜੇ 17 ਸਾਲ ਦੀ ਲੜਕੀ ਬੌਰਨ ਕੁਈਨ ਕ੍ਰਿਸੈਂਟ ਬਸ ਐਕਸਚੇਂਜ ਵਿਖੇ ਉਡੀਕ ਕਰ ਰਹੀ ਸੀ ਜਿਥੇ ਇਹ ਬਜ਼ੁਰਗ ਵੀ ਆ ਗਿਆ। ਇਸੇ ਦੌਰਾਨ ਇਕ ਬੱਸ ਆਈ ਅਤੇ ਇਹ ਬਜ਼ੁਰਗ ਵੀ ਲੜਕੀ ਦੇ ਨਾਲ 9 ਨੰਬਰ ਬੱਸ ਵਿਚ ਸਵਾਰ ਹੋ ਗਿਆ।
ਪੁਲਿਸ ਮੁਤਾਬਕ ਸਫ਼ਰ ਦੌਰਾਨ ਬਜ਼ੁਰਗ ਨੇ ਗ਼ੈਰਵਾਜਬ ਤਰੀਕੇ ਨਾਲ ਲੜਕੀ ਨੂੰ ਛੂਹਣਾ ਸ਼ੁਰੂ ਕਰ ਦਿਤਾ। ਕੁਝ ਦੇਰ ਬਾਅਦ ਇਹ ਬਜ਼ੁਰਗ ਬੱਸ ‘ਚੋਂ ਉਤਰ ਗਿਆ। ਪੁਲਿਸ ਨੇ ਸ਼ੱਕੀ ਦੀ ਪਹਿਚਾਣ 60-70 ਸਾਲ ਦੇ ਦਰਮਿਆਨ ਦੱਖਣੀ ਏਸ਼ੀਆਈ ਵਿਅਕਤੀ ਵਜੋਂ ਦੱਸੀ ਹੈ। ਉਸ ਦੀ ਚਿੱਟੀ ਦਾੜ੍ਹੀ ਹੈ ਅਤੇ ਉਸਨੇ ਨੀਲੀ ਸਰਜੀਕਲ ਮਾਸਕ, ਹਲਕੀ ਨੀਲੀ ਦਸਤਾਰ ਅਤੇ ਹਲਕੇ ਰੰਗ ਦਾ ਕੁੜਤਾ ਪਜਾਮਾ ਪਾਇਆ ਹੋਇਆ ਸੀ।
ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਇਸ ਘਟਨਾ ਬਾਰੇ ਕੋਈ ਜਾਣਕਾਰੀ ਹੋਵੇ ਤਾਂ ਤੁਰਤ ਐਬਟਸਫ਼ੋਰਡ ਪਲਿਸ ਨੇ ਜਾਂਚਕਰਤਾਵਾਂ ਨਾਲ 604-859-5225 ‘ਤੇ ਸੰਪਰਕ ਕੀਤਾ ਜਾਵੇ।