ਅਲਬਰਟਾ ਸੂਬੇ ‘ਚ ਇੱਕੋ ਦਿਨ ਰਿਕਾਰਡ 406 ਨਵੇਂ ਕੋਵਿਡ-19 ਕੇਸ ਦਰਜ ਕੀਤੇ ਗਏ। ਸਰਕਾਰੀ ਨੁਮਾਇੰਦੇ ਅਨੁਸਾਰ ਇੱਕ ਮੰਤਰੀ ਦਾ ਕੋਰੋਨਾਵਾਇਰਸ ਦਾ ਟੈਸਟ ਸਕਾਰਾਤਮਕ ਰਿਹਾ ਹੈ ਤਾਂ ਦੂਜੇ ਪਾਸੇ ਸੂਬੇ ਦੇ ਪ੍ਰੀਮੀਅਰ ਜੇਸਨ ਕੇਨੀ ਨੇ ਕੋਰੋਨਾ ਕਾਰਨ ਆਪਣੇ ਆਪ ਨੂੰ ਅਲੱਗ ਥਲੱਗ ਕਰ ਲਿਆ ਹੈ।
ਪ੍ਰੀਮੀਅਰ ਜੇਸਨ ਕੇਨੀ ਦੇ ਦਫਤਰ ਨੇ ਬੁੱਧਵਾਰ ਇਸ ਦੀ ਪੁਸ਼ਟੀ ਕੀਤੀ ਕਿ ਪ੍ਰੀਮੀਅਰ ਦਾ ਟੈਸਟ ਕੀਤਾ ਗਿਆ, ਉਹਨਾਂ ਦੀ ਰਿਪੋਰਟ ਨੈਗੇਟਿਵ ਆਈ ਹੈ, ਪਰ ਉਹ ਤੈਅ ਦਿਨਾਂ ਲਈ ਆਪਣੇ ਆਪ ਨੂੰ ਵੱਖ ਹੀ ਰੱਖਣਗੇ ।
ਪ੍ਰੀਮੀਅਰ ਦੇ ਦਫਤਰ ਦੇ ਡਿਪਟੀ ਪ੍ਰੈਸ ਸਕੱਤਰ ਹੈਰੀਸਨ ਫਲੇਮਿੰਗ ਨੇ ਕਿਹਾ ਕਿ ਮਿਊਂਸਪਲ ਅਫੇਅਰਜ਼ ਦੇ ਮੰਤਰੀ ਟਰੇਸੀ ਐਲਾਰਡ ਦਾ ਬੁੱਧਵਾਰ ਦੁਪਹਿਰ ਨੂੰ ਲਿਆ ਟੈਸਟ ਸਕਾਰਾਤਮਕ ਰਿਹਾ ਅਤੇ ਉਹ ਹਲਕੇ ਲੱਛਣਾਂ ਦਾ ਸਾਹਮਣਾ ਕਰ ਰਹੇ ਸਨ। ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਐਲਾਰਡ ਦਾ ਹਾਲ ਹੀ ਵਿਚ ਇਕ ਕੋਰੋਨਾ ਪੀੜਤ ਨਾਲ ਨੇੜਲਾ ਸੰਪਰਕ ਹੋਇਆ ਸੀ , ਬਾਅਦ ਵਿੱਚ ਉਹਨਾਂ ਦਾ ਕੋਰੋਨਾ ਟੈਸਟ ਪਾਜਿਟਿਵ ਰਿਹਾ ਹੈ ਹਫਤੇ ਦੇ ਅੰਤ ਵਿਚ ਇਸ ਬਾਰੇ ਦੱਸੇ ਜਾਣ ਤੋਂ ਉਹਨਾਂ ਆਪਣੇ ਆਪ ਨੂੰ ਵੱਖ ਕਰ ਲਿਹਾ ਹੈ। ਇਸ ਤਰ੍ਹਾਂ, ਐਲਾਰਡ ਦੇ ਸਕਾਰਾਤਮਕ ਟੈਸਟ ਦੀ ਜਾਣਕਾਰੀ ਮਿਲਣ ‘ਤੇ ਪ੍ਰੀਮੀਅਰ ਵੀ ਤੁਰੰਤ ਸਵੈ-ਅਲੱਗ-ਥਲੱਗ ਹੋ ਗਏ।
ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਆਵਾਜਾਈ ਮੰਤਰੀ ਰਿਕ ਮੈਕਿਵਰ ਅਤੇ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੇ ਵਿਧਾਇਕ ਐਂਜੇਲਾ ਪਿਟ, ਪੀਟਰ ਗੁਥਰੀ ਅਤੇ ਨਾਥਨ ਨਿਉਡੋਰਫ ਵੀ ਸਵੈ-ਅਲੱਗ-ਥਲੱਗ ਹਨ ਕਿਉਂਕਿ ਉਨ੍ਹਾਂ ਪਿਛਲੇ ਹਫ਼ਤੇ ਐਲਾਰਡ ਨਾਲ ਮੁਲਾਕਾਤ ਕੀਤੀ ਸੀ, ਹਾਲਾਂਕਿ ਉਹ ਲੱਛਣ ਨਹੀਂ ਦਿਖਾ ਰਹੇ ਹਨ।
ਫਲੇਮਿੰਗ ਨੇ ਕਿਹਾ ਕਿ ਐਲਾਰਡ ਨੇ ਸੋਮਵਾਰ ਨੂੰ ਵੀਡਿਓ ਕਾਨਫਰੰਸ ਜ਼ਰੀਏ ਇਕ ਸਰਕਾਰੀ ਘੋਸ਼ਣਾ ਵਿਚ ਹਿੱਸਾ ਲਿਆ ਅਤੇ ਮੰਗਲਵਾਰ ਨੂੰ ਸੈਸ਼ਨ ਸ਼ੁਰੂ ਹੋਣ ਤੋਂ ਲੈ ਕੇ ਉਹ ਵਿਧਾਨ ਸਭਾ ਵਿਚ ਨਹੀਂ ਰਹੇ। ਮੰਤਰੀ ਦੇ ਨਜ਼ਦੀਕੀ ਸੰਪਰਕਾਂ ਨੂੰ ਸੂਚਿਤ ਕੀਤਾ ਜਾ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਵੱਖਰਾ ਕਰਨ ਅਤੇ ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਜਾਵੇਗੀ। ਫਲੇਮਿੰਗ ਨੇ ਕਿਹਾ, ‘ਫਿਲਹਾਲ ਅਸੀਂ ਮੰਤਰੀ ਐਲਾਰਡ ਦੇ ਲੱਛਣ ਦਿਖਾਉਣ ਵਾਲੇ ਕਿਸੇ ਨਜ਼ਦੀਕੀ ਸੰਪਰਕ ਤੋਂ ਜਾਣੂ ਨਹੀਂ ਹਾਂ।’
