ਅਮਰੀਕੀ ਰਾਸ਼ਟਰਪਤੀ ਚੋਣਾਂ ਲਈ ਦਿਨੋ ਦਿਨ ਵਧਦਾ ਜਾ ਰਿਹਾ ਹੈ ਸਿਆਸੀ ਮਾਹੌਲ
ਡੋਨਾਲਡ ਟਰੰਪ ਅਤੇ ਜੋ ਬਿਡੇਨ ਇਕ ਦੂਜੇ ਨੂੰ ਦੱਸ ਰਹੇ ਨੇ ਅਯੋਗ ਅਤੇ ਗ਼ੈਰ-ਜਿੰਮੇਵਾਰ
ਉਪ ਰਾਸ਼ਟਰਪਤੀ ਫੁਦੀ ਲਈ ਮੈਦਾਨ ਵਿੱਚ ਡਟੀ ਕਮਲਾ ਹੈਰਿਸ ਨੇ ਟਰੰਪ ‘ਤੇ ਕੀਤੇ ਸ਼ਬਦੀ ਹਮਲੇ
ਟਰੰਪ ਆਪਣੀ ਵਿਰੋਧੀ ਬਿਡੇਨ ਨੂੰ ਦੱਸ ਰਹੇ ਨੇ ਦੇਸ਼ ਵਿਰੋਧੀ
ਬਿਡੇਨ ਬਣੇ ਰਾਸ਼ਟਰਪਤੀ ਤਾਂ ਅਮਰੀਕਾ ਤਬਾਹ ਹੋ ਜਾਵੇਗਾ : ਟਰੰਪ
ਵਾਸ਼ਿੰਗਟਨ : ਰਾਸ਼ਟਰਪਤੀ ਚੋਣਾਂ ਨੂੰ ਲੈ ਕੇ ਅਮਰੀਕਾ ਵਿੱਚ ਸਿਆਸੀ ਮਾਹੌਲ ਇਸ ਸਮੇਂ ਪੂਰੀ ਤਰ੍ਹਾਂ ਗਰਮਾਇਆ ਹੋਇਆ ਹੈ।
ਮੁੱਖ ਸਿਆਸੀ ਦਲ ਰਿਪਬਲਿਕਨ ਅਤੇ ਡੈਮੋਕ੍ਰੇਟਿਕ ਪਾਰਟੀਆਂ ਵੱਲੋਂ ਇਕ ਦੂਜੇ ਨੂੰ ਨੀਵਾਂ ਵਿਖਾਉਣ ਦਾ ਕੋਈ ਵੀ ਮੌਕਾ ਨਹੀਂ ਛੱਡਿਆ ਜਾ ਰਿਹਾ। ਵਿਰੋਧੀ ਧਿਰ ਡੋਨਾਲਡ ਟਰੰਪ ਨੂੰ ਆਯੋਗ ਦੱਸ ਰਹੇ ਨੇ ਤਾਂ ਟਰੰਪ ਬਿਡੇਨ ਨੂੰ ਅਮਰੀਕਾ ਵਿਰੋਧੀ ਕਹਿ ਰਹੇ ਨੇ।
ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਹੈ ਕਿ ਜੇਕਰ ਡੈਮੋਕ੍ਰੇਟਿਕ ਪਾਰਟੀ ਦੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਜੋ ਬਿਡੇਨ ਤਿੰਨ ਨਵੰਬਰ ਨੂੰ ਹੋਣ ਵਾਲੀ ਚੋਣ ‘ਚ ਜਿੱਤ ਜਾਂਦੇ ਹਨ ਤਾਂ ਅਮਰੀਕਾ ਤਬਾਹ ਹੋ ਜਾਵੇਗਾ। ਇੰਨਾ ਹੀ ਨਹੀਂ ਵਿਸ਼ਵ ਦੀ ਸਭ ਤੋਂ ਵੱਡੀ ਅਰਥਵਿਵਸਥਾ ਦੁਨੀਆ ‘ਚ ਹਾਸੇ ਦਾ ਪਾਤਰ ਬਣ ਜਾਵੇਗੀ। ਟਰੰਪ ਨੇ ਕਿਹਾ ਕਿ ਬਿਡੇਨ ਦੀਆਂ ਤਜਵੀਜ਼ਸ਼ੁਦਾ ਨੀਤੀਆਂ ਦੇਸ਼ ਲਈ ਚੰਗੀ ਨਹੀਂ ਹਨ।
ਰਾਸ਼ਟਰਪਤੀ ਨੇ ਵ੍ਹਾਈਟ ਹਾਊਸ ‘ਚ ਪੱਤਰਕਾਰਾਂ ਨੂੰ ਕਿਹਾ, ‘ਬਿਡੇਨ ਲਗਾਤਾਰ ਮਹਾਮਾਰੀ ਦਾ ਸਿਆਸੀਕਰਨ ਕਰ ਰਹੇ ਹਨ। ਉਹ ਵਾਇਰਸ ਬਾਰੇ ਗ਼ਲਤ ਜਾਣਕਾਰੀ ਫੈਲਾਅ ਰਹੇ ਹਨ। ਉਹ ਨਾ ਸਿਰਫ਼ ਵਿਗਿਆਨਕ ਸਬੂਤਾਂ ਦੀ ਅਣਦੇਖੀ ਕਰ ਰਹੇ ਹਨ ਬਲਕਿ ਤੱਥਾਂ ‘ਤੇ ਖੱਬੇ-ਪੱਖੀ ਸਿਆਸਤ ਥੋਪ ਰਹੇ ਹਨ।’
ਟਰੰਪ ਨੇ ਇਕ ਟਵੀਟ ‘ਚ ਕਿਹਾ, ‘ਜੇਕਰ ਬਿਡੇਨ ਰਾਸ਼ਟਰਪਤੀ ਬਣੇ ਤਾਂ ਨਾ ਸਿਰਫ਼ ਦੁਨੀਆ ਸਾਡੇ ‘ਤੇ ਹੱਸੇਗੀ ਬਲਕਿ ਹਰੇਕ ਦੇਸ਼ ਅਮਰੀਕਾ ਦਾ ਲਾਭ ਉਠਾਉਣ ਦੀ ਕੋਸ਼ਿਸ ਕਰੇਗਾ। ਸਾਡਾ ਦੇਸ਼ ਤਬਾਹ ਹੋ ਜਾਵੇਗਾ।’ ਟਰੰਪ ਨੇ ਟਵੀਟ ਦੇ ਨਾਲ ਹੀ ਫਾਕਸ ਨਿਊਜ਼ ਦੀ ਇਕ ਵੀਡੀਓ ਕਲਿਪਿੰਗ ਵੀ ਟੈਗ ਕੀਤੀ ਹੈ, ਜਿਸ ‘ਚ ਮੇਜ਼ਬਾਨ ਨੇ ਬਿਡੇਨ ਦੀ ਪ੍ਰਸ਼ੰਸਾ ਕਰਨ ‘ਤੇ ਭਾਰਤੀ ਮੂਲ ਦੀ ਅਮਰੀਕੀ ਸੰਸਦ ਮੈਂਬਰ ਪ੍ਰਮਿਲਾ ਜੈਪਾਲ ਦੀ ਆਲੋਚਨਾ ਕੀਤੀ ਹੈ।
The world will be laughing and taking full advantage of the United States if Joe Biden ever became President. Our Country would COLLAPSE! pic.twitter.com/lxcyxYL9YC
— Donald J. Trump (@realDonaldTrump) August 13, 2020
ਰਾਸ਼ਟਰਪਤੀ ਨੇ ਕਿਹਾ ਕਿ ਜਿਹੜੇ ਬਿਡੇਨ ਯੂਰਪ ਤੇ ਚੀਨ ‘ਤੇ ਲਗਾਈਆਂ ਗਈਆਂ ਯਾਤਰਾ ਪਾਬੰਦੀਆਂ ਦਾ ਵਿਰੋਧ ਕਰ ਰਹੇ ਸਨ। ਜੇਕਰ ਮੈਂ ਉਨ੍ਹਾਂ ਦੀ ਸਲਾਹ ਸੁਣੀ ਹੈ ਤਾਂ ਹੋਰ ਲੱਖਾਂ ਲੋਕ ਮਹਾਮਾਰੀ ਦੀ ਚਪੇਟ ‘ਚ ਆ ਕੇ ਜਾਨ ਗੁਆ ਦਿੰਦੇ। ਟਰੰਪ ਨੇ ਦੋਸ਼ ਲਗਾਇਆ ਕਿ ਬਿਡੇਨ ਅਮਰੀਕੀ ਸਰਹੱਦਾਂ ਖੋਲ੍ਹਣਾ ਚਾਹੁੰਦੇ ਹਨ। ਜੇਕਰ ਅਜਿਹਾ ਹੋਇਆ ਤਾਂ ਮਹਾਮਾਰੀ ਨਾਲ ਹੋਰ ਵੀ ਅਮਰੀਕੀ ਪ੍ਰਭਾਵਿਤ ਹੋ ਸਕਦੇ ਹਨ।